UPI ପେମେଣ୍ଟ ପାଇଁ ଚାର୍ଜ ମାମଲା , ନୋଟିସ୍ ଜାରି କଲେ ସୁପ୍ରିମକୋର୍ଟ
UPI ପେମେଣ୍ଟ ଉପରେ ମର୍ଚ୍ଚାଣ୍ଟ ଡିସକାଉଣ୍ଟ ରେଟ୍ (MDR) ଲାଗୁ କରିବା ପ୍ରସଙ୍ଗ ଏବେ ସୁପ୍ରିମକୋର୍ଟରେ ପହଞ୍ଚିଛି। ମାମଲାରେ ତୁରନ୍ତ ସ୍ଥଗିତାଦେଶ ଦେବାକୁ କୋର୍ଟ ମନା କରିଥିବା ବେଳେ କେନ୍ଦ୍ର ସରକାର, RBI ଓ NPCI ସମେତ ସମ୍ପୃକ୍ତ ପକ୍ଷଙ୍କୁ ନୋଟିସ୍ ଜାରି କରିଛନ୍ତି।
ମୁଖ୍ୟ ବିଚାରପତି ସୂର୍ଯ୍ୟକାନ୍ତ, ବିଚାରପତି ଜୟମାଲ୍ୟ ବାଗଚୀ ଓ ବିଚାରପତି ଭି. ମୋହନଙ୍କ ଖଣ୍ଡପୀଠ ମାମଲାର ଶୁଣାଣି ପାଇଁ ରାଜି ହୋଇଛନ୍ତି। ଚାରି ସପ୍ତାହ ମଧ୍ୟରେ ନୋଟିସ୍ର ଜବାବ ସତ୍ୟପାଠ ମାଧ୍ୟମରେ ଦେବାକୁ ସମ୍ପୃକ୍ତ ପକ୍ଷଙ୍କୁ କୁହାଯାଇଛି। ଆଡଭୋକେଟ୍ ଅଞ୍ଜନ ଦତ୍ତଙ୍କ ପକ୍ଷରୁ ଏହି PIL ଦାଖଲ ହୋଇଛି।
କେନ୍ଦ୍ର ସରକାରଙ୍କ ପକ୍ଷରୁ କୋର୍ଟଙ୍କୁ କୁହାଯାଇଛି ଯେ ପ୍ରସ୍ତାବିତ ନୂଆ ବ୍ୟବସ୍ଥାରେ ପେମେଣ୍ଟ ଗେଟୱେ ମାଧ୍ୟମରେ ହେଉଥିବା ପ୍ରାୟ ୯୬ ପ୍ରତିଶତ କାରବାର ଚାର୍ଜମୁକ୍ତ ରହିବ।
ଅକ୍ଟୋବର ୧୫ରୁ ୨,୦୦୦ ଟଙ୍କାରୁ ଅଧିକ କିଛି ବ୍ୟବସାୟିକ UPI କାରବାର ଉପରେ ୦.୪ ପ୍ରତିଶତ MDR ଲାଗୁ ହେବାର ବ୍ୟବସ୍ଥା ରହିଛି। ୭୫,୦୦୦ ଟଙ୍କା କିମ୍ବା ତା’ଠାରୁ ଅଧିକ କାରବାର ପାଇଁ ସର୍ବାଧିକ MDR ୩୦୦ ଟଙ୍କା ରହିବ। ରେଳବାଇ, ଟେଲିକମ୍, ବୀମା, ଇନ୍ଧନ ଓ କୃଷି ଭଳି କ୍ଷେତ୍ରରେ ୫ ଟଙ୍କା ସ୍ଥିର MDR ରଖାଯିବ।
ଅନ୍ୟପକ୍ଷରେ, ବ୍ୟକ୍ତିରୁ ବ୍ୟକ୍ତି (P2P) UPI ଟ୍ରାନ୍ସଫରରେ କୌଣସି ଶୁଳ୍କ ଲାଗୁ ହେବ ନାହିଁ। ଆବେଦନରେ ଏହି ଚାର୍ଜ ବ୍ୟବସ୍ଥାର ଆଇନଗତ ବୈଧତା ଓ ପାରଦର୍ଶିତାକୁ ନେଇ ପ୍ରଶ୍ନ ଉଠାଯାଇଛି।
